Breaking News

5 வகையான ‘ஸ்மார்ட்’ கார்டுகள் தயாரிக்கும் பணி தீவிரம்.. ஏப்ரல் 1–ந்தேதி முதல் வினியோகம்..!


ஸ்மார்ட் ரே‌ஷன் கார்டு


தமிழகம் முழுவதும் வருகிற 1–ந்தேதி முதல் தற்போது உள்ள ரே‌ஷன்கார்டுகளுக்கு பதிலாக ‘ஸ்மார்ட் கார்டு’ என்கிற புதிய ரே‌ஷன் கார்டு வழங்கப்படும் என தமிழக அரசு ஏற்கனவே அறிவித்தது. இந்த அறிவிப்பின்படி ரே‌ஷன்கார்டுதாரர்களிடம் ஏற்கனவே அந்தந்த நியாயவிலைக்கடைகளின் மூலம் பெறப்பட்ட தகவல்கள் மற்றும் புள்ளி விவரங்களின் அடிப்படையில் ஸ்மார்ட் கார்டுகளை தயாரிக்கும் பணியானது தீவிரமாக நடந்து வருகிறது.
புதிதாக வழங்கப்பட இருக்கும் ஸ்மார்ட் கார்டு ‘பான்’ கார்டு வடிவில் இருக்கும். இதன் முதல் பக்கத்தின் மேல் பகுதியில் அரசு முத்திரையுடன் உணவு பொருள் வழங்கல் மற்றும் நுகர்வோர் பாதுகாப்பு துறை என்ற எழுத்துக்களும், அதற்கு கீழ் குடும்ப தலைவர் பெயர், கணவர் அல்லது தந்தை பெயர், பிறந்த தேதி, புகைப்படம் தனி குறியீட்டு எண் முகவரி போன்றவையும், பின்புறத்தில் குடும்ப உறுப்பினர்கள் பெயர், ரே‌ஷன் கடை எண், ஆண்டு மற்றும் கியூ. ஆர் என்ற ரகசிய குறியீடு இருக்கும். கார்டின் கீழ் பகுதியில் இந்த கார்டை முகவரிக்காக பயன்படுத்தக்கூடாது என எழுதப்பட்டு இருக்கும்.
ஐந்து வகை


இந்த ஸ்மார்ட் கார்டுகள் ஐந்து வகைகளாக வெளியிடப்பட இருக்கிறது.

கார்டில் புகைப்படம் அருகில்....


  • பி.எச்.எச்.– ரைஸ் என்றிருந்தால் அனைத்து பொருட்களும் கிடைக்கும். 



  • பி. எச்.எச். – ஏ என்றிருந்தால் 35 கிலோ அரிசி உள்பட அனைத்து பொருட்களும் தரப்படும். 



  • என்.பி.எச்.எச். என மட்டும் இருந்தால் அரிசி உள்பட அனைத்து பொருட்களும் கிடைக்கும். 



  • என்.பி.எச். எச். –எஸ் என இருந்தால் சர்க்கரை மட்டும் வழங்கப்படும். 



  • என்.பி.எச்.எச்.– என்.சி. என்றிருந்தால் எந்த பொருட்களும் வழங்கப்பட மாட்டாது.
Read more ...

போலீஸ் இன்ஸ்பெக்டருக்கு 10 ஆண்டுகள் சிறை தண்டனை தஞ்சை கோர்ட்டு தீர்ப்பு..!


தஞ்சை காவேரி நகரை சேர்ந்தவர் ரவிராஜ். இவர் 2007-ம் ஆண்டு தஞ்சை மாவட்ட போலீஸ் சூப்பிரண்டிடம் ஒரு புகார் கொடுத்தார். அதில் 3 பேர் தன்னிடமும், தனது நண்பரிடமும் பிரபல நிறுவனத்தில் வேலை வாங்கித்தருவதாக கூறி ரூ.3 லட்சம் மோசடி செய்து விட்டதாக கூறி இருந்தார். இந்த புகார் தொடர்பாக விசாரித்து உரிய நடவடிக்கை எடுக்குமாறு தஞ்சை மருத்துவகல்லூரி போலீசாருக்கு போலீஸ் சூப்பிரண்டு உத்தரவிட்டார்.

இது குறித்து தஞ்சையை அடுத்த துறையுண்டார்கோட்டையை சேர்ந்த ஜானகிராமன், கோவை வடவெள்ளியை சேர்ந்த பெண் என்ஜினீயர் அகிலா என்ற அகிலாண்டேஸ்வரி (வயது32), இளையராஜா ஆகிய 3 பேர் மீது தஞ்சை மருத்துவகல்லூரி போலீஸ் இன்ஸ்பெக்டராக இருந்த சேதுமணிமாதவன் வழக்குப்பதிவு செய்து விசாரணை நடத்தினார். இந்த வழக்கில் ஜானகிராமன், இளையராஜா ஆகியோர் கைது செய்யப்பட்டனர்.

தூக்குப்போட்டு தற்கொலை
இதைத்தொடர்ந்து அகிலாண்டேஸ்வரியை விசாரணைக்கு ஆஜராக கோவையில் இருந்து தஞ்சைக்கு வருமாறு இன்ஸ்பெக்டர் சேதுமணிமாதவன் தகவல் தெரிவித்தார். அதன் பேரில் 16-11-2007 அன்று அகிலாண்டேஸ்வரி தஞ்சைக்கு வந்தார்.

அப்போது இன்ஸ்பெக்டர் சேதுமணிமாதவன், விசாரணைக்காக அகிலாண்டேஸ் வரியை தஞ்சை ராமநாதன் ரவுண்டானா அருகே உள்ள ஒரு தனியார் ஓட்டலில் தங்க வைத்து விசாரணை நடத்தினார். இந்த நிலையில் 19-11-2007 அன்று அகிலாண்டேஸ்வரி தான் தங்கி இருந்த அறையில் தூக்குப்போட்டு தற்கொலை செய்து கொண்டார்.

சி.பி.சி.ஐ.டி. போலீஸ் விசாரணை
இது குறித்து தஞ்சை நகர தெற்கு போலீசார் முதலில் சந்தேக மரணம் என வழக்குப்பதிவு செய்து விசாரணை நடத்தினர். பின்னர் 20-11-2007 அன்று அகிலாண்டேஸ்வரியை தற்கொலைக்கு தூண்டியதாக, தஞ்சை மருத்துவகல்லூரி போலீஸ் இன்ஸ்பெக்டராக இருந்த சேதுமணிமாதவன், போலீஸ் ஏட்டு கணேசன், அரசு ஊழியர் பாலு என்ற பாலசுப்பிரமணியன் ஆகிய 3 பேர் மீது வழக்குப் பதிவு அவர்களை கைது செய்து விசாரணை நடத்தினர்.

இந்த வழக்கு 15-2-2008 அன்று தஞ்சை சி.பி.சி.ஐ.டி. போலீசுக்கு மாற்றப்பட்டது. சி.பி.சி.ஐ.டி. போலீசார் வழக்கை விசாரித்து 28-10-2009 அன்று குற்றப்பத்திரிகை தாக்கல் செய்தனர். இந்த வழக்கு விசாரணை தஞ்சை மகளிர் விரைவு நீதிமன்றத்தில் நடந்து வந்தது. வழக்கு விசாரணை நடைபெற்ற போது பாலசுப்பிர மணியன் இறந்து விட்டார்.

10 ஆண்டுகள் சிறை தண்டனை
இந்த வழக்கு நீதிபதி ஆனந்த் முன்னிலையில் நேற்று விசாரணைக்கு வந்தது. அப்போது போலீஸ் இன்ஸ்பெக்டர் சேதுமணிமாதவனுக்கு இந்திய தண்டனை சட்டம் பிரிவு 409-ன் கீழ் (அரசு ஊழியராக இருந்து நம்பிக்கை துரோகம் செய்தல்) 10 ஆண்டுகள் சிறை தண்டனையும், ரூ.1000 அபராதமும், இந்திய தண்டனை சட்டம் 343 பிரிவின் கீழ் (சட்டத்துக்கு புறம்பாக அடைத்து வைத்தல்) 2 ஆண்டு சிறை தண்டனையும், ரூ.500 அபராதமும், 120 (பி) (கூட்டுசதி செய்தல்) 10 ஆண்டுகள் சிறைதண்டனையும், ரூ.1000 அபராதமும் விதித்து நீதிபதி ஆனந்த் உத்தரவிட்டார்.

இதனை ஏக காலத்தில் அனுபவிக்க வேண்டும் என நீதிபதி உத்தரவிட்டார். இதன் மூலம் சேதுமணிமாதவன் 10 ஆண்டுகள் சிறை தண்டனையும், ரூ.2,500 அபராதமும் கட்ட வேண்டும். இன்ஸ்பெக்டர் சேதுமணிமாதவன் தற்போது மதுரை தெப்பக்குளம் போலீஸ் நிலையத்தில் இன்ஸ்பெக்டராக பணியாற்றி வருகிறார் என்பது குறிப்பிடத்தக்கது. போலீஸ் ஏட்டாக இருந்த கணேசன் இந்த வழக்கில் இருந்து விடுதலை செய்யப்பட்டார். இன்ஸ்பெக்டர் சேதுமணிமாதவன் திருச்சி மத்திய சிறையில் அடைக்கப்பட்டார்.
Read more ...

துபாயில் பைக் ஓட்டிகளுக்கு புதிய சட்டங்கள் அறிவிப்பு..!

துபையில் கூரியர் நிறுவனங்கள், உணவகங்கள் மற்றும் தனியார் நிறுவனங்கள் பைக் மெஸஞ்சர்கள் மற்றும் பைக் டெலிவரி ஆட்களை வேலைக்கு அமர்த்தியுள்ளன. நிரம்பி வழியும் துபை போக்குவரத்தில் இத்தகைய பைக்குகள் பெறும் உதவிகரமாக விளங்குகின்றன.

அதேவேளை பின்பறம் பெட்டிகள் இணைக்கப்பட்ட பைக்குகளால் விபத்துக்களும் பெருகி வருகின்றன. 2015, 2016 ஆம் ஆண்டுகளில் நடைபெற்ற பைக் விபத்துக்களில் 26 பேர் உயிரிழந்துள்ளனர். 824 பைக் ஓட்டுனர்கள் போக்குவரத்து குற்றங்களுக்காக தண்டிக்கப்பட்டுள்ளனர் மேலும் 786 பைக்குகள் பறிமுதல் செய்யப்பட்டதையும் தொடர்ந்து துபை போக்குவரத்து துறை (RTA), துபை போலீஸ், துபை மாநகராட்சி மற்றும் துபை பொருளாதார வளர்ச்சித் துறை (DED) ஆகியவை இணைந்து புதிய உத்தரவுகளை பிறப்பித்துள்ளன.

2017 ஜூன் 6 ஆம் தேதி முதல் நடைமுறைக்கு வரும் பைக்குகளுக்கான புதிய உத்தரவுகளின்படி..

  • பைக்குகள் பின்புறம் இணைக்கப்பட்டுள்ள பெட்டிகள் 50x50x50 cm என்ற அளவிற்கு மேல் இருக்கக்கூடாது.

  • டெலிவெரி பெட்டிகளின் அனைத்து புறங்களிலும் விளக்குகள் பொருத்தப்பட்டிருக்க வேண்டும்.

  • இடைவெளி இல்லாமல் பைக்குடன் இறுக்கமாக பொருத்தப்பட்டிருக்க வேண்டும்.

  • டெலிவெரி பெட்டிகளை பைக்குடன் பொருத்த வெல்டிங் செய்யாமல் ஸ்க்ரூ, போல்ட், நட்டுக்களை கொண்டே இணைக்க வேண்டும்.

  • பெட்டியின் வெளிப்புறம் பிளாஸ்டிக் மேலுறை கொண்டு மூடப்பட்டும், பெட்டியின் முனைகள் கூர்மையில்லாமலும் இருக்க வேண்டும்.

  • பின்புறம் பயணிகளை ஏற்றிச் செல்லக்கூடாது.

  • டெலிவெரி பெட்டிகளில் மின்னும் பட்டிகளை (Phosphoric reflector strip) ஒட்டியிருக்க வேண்டும்.

  • 20 மீட்டர் தூரத்திலிருந்தும் பிறர் படிக்கும் வகையில் பெட்டியில் தேவையான குறிப்புகள் எழுதியிருக்க வேண்டும் எனவும் அறிவுறுத்தப்பட்டுள்ளது.

என்றாலும், புதிய உத்தரவுக்குள் மாற பைக் ஓட்டிகளுக்கு 2018 மார்ச் 6 ஆம் தேதி வரை கருணை அடிப்படையில் அவகாசமும் தரப்பட்டுள்ளது.
Read more ...

தேனியில், நியூட்ரினோ ஆய்வு மையம் அமைக்க பசுமைத் தீர்ப்பாயம் தடை..!

தேனி மாவட்டம், தேவாரம் பொட்டிப்புரம் பகுதியில் அமைய உள்ள நியூட்ரினோ ஆய்வு மையம் தொடர்பாக, இன்று தென்மண்டல பசுமைத் தீர்ப்பாயத்தில் விசாரணை நடந்தது. அப்போது, சுற்றுச்சூழல் அனுமதியை ரத்துசெய்து உத்தரவிட்டது, தென் மண்டல பசுமைத் தீர்ப்பாயம். இப்பகுதி, மேற்குத் தொடர்ச்சி மலையில் உள்ள காடுகளில் ஏராளமான வன விலங்குகள் உள்ளன. வனச் செழுமையும் பெற்றுள்ள பகுதி இது. இந்நிலையில் இத்திட்டத்தைச் செயல்படுத்த வனத்துறையின் அனுமதியைப் பெறவில்லை என்றும் கூறப்படுகிறது.


நியூட்ரினோ ஆய்வகத்துக்கு எதிராக 2015-ம் ஆண்டில் பூவுலகின் நண்பர்கள் அமைப்பின் சார்பில் சுந்தர்ராஜன், தேசிய பசுமைத் தீர்ப்பாயத்தில் வழக்கு தொடர்ந்தார். நியூட்ரினோ திட்டம் குறித்து ஆய்வு செய்வதற்காக 7 பேர் கொண்ட வல்லுநர் குழுவை தமிழ்நாடு மாசுக் கட்டுப்பாட்டு வாரியம் அமைத்தது. நியூட்ரினோ திட்டம் தொடர்பாக 3 மாத காலத்துக்குள் அறிக்கை தாக்கல்செய்ய வேண்டும் என்று பசுமைத் தீர்ப்பாயம் உத்தரவிட்டது.

நியூட்ரினோ ஆய்வுத் திட்டத்துக்காக, மலையைக் குடைந்து சுமார் 8 லட்சம் டன் பாறைகளை அகற்றவேண்டியது இருக்கும். இந்நிலையில், ஆய்வகத்துக்கான சுற்றுச்சூழல் அனுமதி ரத்து செய்யப்பட்டிருக்கிறது.

பூவுலகின் நண்பர்கள் கூறுகையில்...

நியூட்ரினோ திட்டத்திற்கு வழங்கப்பட்ட சுற்றுச்சூழல் அனுமதியை ரத்து செய்ய கோரி பூவுலகின் நண்பர்கள் சார்பில் தாக்கல் செய்யப்பட்ட வழக்கில் எங்களது வாதத்தை ஏற்றுக்கொண்டு தேசிய பசுமை தீர்ப்பாயம் நேற்று அனுமதியை ரத்து செய்துள்ளது. இந்த தீர்ப்பை வரவேற்கிறோம்.

நாங்கள் வைத்த முக்கியமான வாதங்கள்:

  • இந்த திட்டத்திற்கான அனுமதியை ஒரு சாதாரண கட்டிடம் கட்டுவதற்கான அனுமதி போல வாங்கப்பட்டுள்ளது. அதாவது எந்த சுற்றுச்சூழல் தாக்கீது அறிக்கையும், மக்கள் கருத்துக் கேட்கவும் தேவையில்லை என்கிற நிலைப்பாட்டை அவர்கள் எடுத்து வைத்தார்கள். அப்போது எங்கள் வழக்கறிஞர் தரப்பு எப்படி இது ஒரு தவறான வாதம் என்பதையும் எந்த பிரிவின் கீழ் அனுமதி வாங்கியிருக்கவேண்டும் என்பதையும் எடுத்து காட்டிய போது தீர்ப்பாயம் ஏற்றுக்கொண்டது. 
  • நியூட்ரினோ திட்டத்திற்கான "சூழல் தாக்கீது அறிக்கையை தயார் செய்தது சலீம் அலி நிறுவனம். இந்த நிறுவனம் இது போன்ற ஆய்வுகளை தயார் செய்வதற்கு அங்கீகரிக்கப்பட்ட நிறுவனம் அல்ல என்பதை நாங்கள் நிரூபித்தத்தை தீர்ப்பாயம் ஏற்றுக்கொண்டது. 
  • பலலட்சக்கணக்கான கிலோ வெடி மருந்துகளை பயன்படுத்தி, பல லட்சக்கணக்கான டன் பாறைகளை உடைக்கும் போது சூழலில் ஏற்படும் விளைவுகளை சூழல் ஆய்வு செய்த நிறுவனம் செய்யவில்லை என்பதை தீர்ப்பாயம் ஏற்றுக்கொண்டது. 
  • இந்த திட்டத்தின் இரண்டாவது கட்டத்தில் நியூட்ரினோ கற்றைகளை வைத்து ஆய்வு செய்யும் போது, கதிர்வீச்சு அபாயங்கள் ஏற்படும் என்றும் அதற்கூறிய ஆய்வுகளை மேற்கொள்ளவில்லை என்றும் நிரூபித்தோம். அதற்கு பதில் அளித்த இந்திய கணிதவியல் நிறுவனம் அந்த மாதிரியான திட்டத்தை கைவிட்டுவிட்டதாக சொன்னது, அதற்கு பதில் சொன்ன நீதிபதிகள் "ஆனால் உங்கள் திட்ட அறிக்கையில் அப்படி இருக்கிறதே" என்று சொல்ல, அவர்களிடம் பதிலேதும் இல்லை. 
  • நீர்நிலைகள், நீர் அடுக்குகள் (aquifiers) பாதிக்கப்படாது என்பதற்கும் எந்த வித ஆய்வுகளும் இல்லை என்பதையும் தெளிவாக எடுத்து வைத்தோம். 
  • இன்று கடைசியாக எப்படி இந்த திட்டத்தில் பல விசயங்களை மூடிமறைத்துள்ளார்கள் என்பதையும் எடுத்துவைத்தோம். மதிகெட்டான் சோலை என்கிற தேசிய பூங்காவின் எல்லையில் இருந்து 5 கிலோ மீட்டர் தொலைவில் இந்த திட்டம் அமைய இருப்பதால் தேசிய வனவிலங்கு வாரியத்திடம் அனுமதி வாங்கியிருக்க வேண்டும், ஆனால் அவர்கள் அப்படி அனுமதியே வாங்க தேவையில்லை என்று சொன்னதை தீர்ப்பாயம் ஏற்றுக்கொள்ளவில்லை. 


எங்களுடைய எல்லா வாதங்களையும் ஏற்றுக்கொண்டாலும், இவற்றில் இரண்டு காரணங்களே போதுமானது இந்த அனுமதியை ரத்து செய்வதற்கு என்று கூறி, நியூட்ரினோ திட்டத்திற்கான சுற்றுச்சூழல் அனுமதியை தீர்ப்பாயம் ரத்து செய்தது. இந்த வழக்கை தொடுத்தது முதல் தொடர்ந்து கண்காணித்து எங்கள் வழக்கறிஞர் குழு நடத்திவந்து இன்று இறுதியில் வெற்றியை பெற்றுக் கொடுத்துள்ளது.

இந்த இடைப்பட்ட காலத்தில் எவ்வளவோ அவமானங்களையும் வசவுகளையும் சுமக்க வேண்டியிருந்தது. எதற்கும் கலங்காமல் தொடர்ந்து பயணம் செய்ததின் விளைவு ஒரு சின்ன வெற்றியை பெற்றுள்ளோம். உண்மையில் அணுசக்தி துறையின் திட்டங்களை எதிர்த்து வெற்றி பெறுவது அவ்வளவு சுலபமானது இல்லை.

இந்த தருணத்தில் எங்களின் மூத்த வழக்கறிஞர் திரு.ராதாகிருஷ்ணன் அவர்களின் பணிக்கு எந்த வார்த்தைகளாலும் நன்றி சொல்லிவிடமுடியாது. அவர் இல்லையெனில் நாங்கள் இல்லை என்று சொல்லலாம், தொடர்ந்து எங்களுடன் பல்வேறு பிரச்சனைகளில் உடன் நின்றவர், இன்று அந்த பகுதி மக்களுக்கான சிறு வெற்றியை பெற்று தந்துள்ளார். அவருடைய பணிகளுக்கு மனதார பாராட்டுகளை தெரிவித்து கொள்கிறோம். பூவுலகின் நண்பர்கள் அமைப்பை சேர்ந்த வழ. வெற்றி செல்வன், மற்றும் வழ. சுந்தரராஜன், இந்த இருவரின் பணிகள் மிகவும் பாராட்டுதலுக்கு உரியவை, பல்வேறு சிரமங்களுக்குஇடையிலும் இந்த வழக்கை சிறப்பாக நடத்தி எங்கள் மூத்த வழக்கறிஞருக்கு துணை புரிந்தார்கள்.

பூவுலகின் நண்பர்கள் அமைப்பை சேர்ந்த ஒவ்வொருவரும் இந்த வழக்கில் அவர்களுடைய பங்களிப்பை செய்துள்ளார்கள், ஹரிணி எடுத்துக்கொடுத்த மதிகெட்டான் சோலை கூகிள் வரைபடம்தான் இன்றைக்கு இறுதியான முடிவை எட்டவைத்தது, விஜய் அசோகன், எந்த நாட்டில் இருந்தாலும் நியூட்ரினோ திட்டத்தை எத்தனை விஞ்ஞானிகள் ஆதரித்தாலும் அவர்களுக்கு இணையான எதிர்வாதம் வைத்து அவர்களை நிலைகொள்ள முடியாமல் செய்தார்.

இந்த தருணத்தில் சென்னை உயர்நீதிமன்றத்தில் வாதாடி இந்த திட்டத்திற்கு இடைக்கால தடை வாங்கியும், மக்களிடையே இந்த திட்டம் தொடர்பான பிரச்சாரங்களை முன்னெடுத்த ம.தி.மு.க. பொதுச்செயலாளர் திரு.வைகோ அவர்களுக்கும், நியூட்ரினோ எதிர்ப்பு இயக்கத்தை சேர்ந்த திரு லெனின் ராஜப்பா, முல்லை பெரியார் விவசாயிகள் பாதுகாப்பு சங்கத்தின் திரு.அபாஸ், அணுசக்திக்கு எதிரான மக்கள் இயக்கத்தின் ஒருங்கிணைப்பாளர் திரு.சுப. உதயகுமார், மே 17 இயக்கத்தின் திருமுருகன் காந்தி, முகிலன், விவசாய விடுதலை முன்னணியை சேர்ந்த திரு.மாறன், கலிலியோ அறிவியல் மையத்தை சேர்ந்த சத்யா, விடுதலை சிறுத்தைகள், திரு.வி.டி. பத்மநாபன், மனித நேய மக்கள் கட்சி, தமிழக வாழ்வுரிமை கட்சி, SDPI, நாம் தமிழர், தமிழ்த்தேசிய பேரியக்கம், திராவிடர் விடுதலை கழகம், தந்தை பெரியார் திராவிடர் கழகம், நாணல் நண்பர்கள், இந்த திட்டம் குறித்த பல்வேறு விசயங்களை மக்களுக்கு எடுத்து சொன்ன ஊடகங்கள், மற்றும் அந்த பகுதியில் இருக்கக்கூடிய அனைத்து கிராம மக்கள் அனைவருக்கும் நன்றிகளையும் பாராட்டுகளையும் சொல்லிக்கொள்கிறோம்.

திரும்பவும் சொல்கிறோம், சட்டப்படி நடந்துக் கொள்ளுங்கள் என்று ஒரு அரசு அமைப்புக்குச் சொல்வதற்கே இந்த நாட்டில் சட்ட போராட்டம் நடத்தவேண்டியுள்ளது. இதை சட்ட போராட்டமே இறுதி தீர்வு என்று நாங்கள் சொல்லவில்லை, ஜனநாயகம் இன்று நமக்கு வழங்கியுள்ள வழிமுறைகளை பயன்படுத்தி முன்னேறுவோம், நியாயத்தை தேடி மக்கள் மன்றங்களிலும் பல்வேறு அமைப்புகளுடன் நாம் சேர்ந்து பணியாற்றுவோம்.



இந்த திட்டம் பற்றி அன்று முதல் இன்று வரை கடந்து வந்த பாதை...
►1956ல் இந்தியாவில் முதன் முதலாக நியூட்ரினோ, கோலார் தங்க வயல் சுரங்கத்தில் கண்டுபிடிக்கப்பட்டது.

►2002ல் மத்திய அணுசக்தித் துறையிடம் நியுட்ரினோ திட்டம் அறிக்கை சமர்ப்பிக்கப்பட்டது.

►2009ல் சுற்றுச்சுழல் துறை நியுட்ரினோ திட்டத்திற்கு அனுமதி மறுத்தது.

►2010ல் தேனி மாவட்டம், பொட்டிபுரத்தில் நியூட்ரினோ ஆய்வு மையம் அமைக்க சுற்றுச்சூழல் மற்றும் வனத்துறை அனுமதி அளித்தது.

►2012ல் நியுட்ரினோ திட்டத்துக்கான நிலங்கள் ஒதுக்கீடு செய்யப்பட்டன.

►2015ல் நியுட்ரினோ திட்டத்திற்கு மத்திய அரசு 1500 கோடி ரூபாய் ஒதுக்கீடு செய்தது.

►2015ம் ஆண்டில் நியூட்ரினோ ஆய்வு மையத்திற்கு எதிர்ப்பு தெரிவித்து உயர்நீதிமன்ற மதுரை கிளையில் வைகோ வழக்கு தொடர்ந்தார்.

►2015ம் ஆண்டில் தமிழ்நாடு மாசு கட்டுப்பாட்டு வாரியத்திடம் இருந்து உரிய அனுமதி பெறும்வரை ஆய்வுப் பணிகளை மேற்கொள்ள உயர்நீதிமன்ற கிளை தடை விதித்தது

►2015ம் ஆண்டில் பூவுலகின் நண்பர்கள் அமைப்பின் சார்பில் சுந்தரராஜன் தேசிய பசுமைத் தீர்ப்பாயத்தில் வழக்கு தொடர்ந்தார்.

►2016ல் நியூட்ரினோ திட்டம் தொடர்பாக ஆய்வு செய்ய நிபுணர்கள் குழு அமைக்க தமிழ்நாடு மாசு கட்டுப்பாடு வாரியம் உத்தரவிட்டது.

►2017ல் நியூட்ரினோ ஆய்வகத்திற்கு வழங்கப்பட்ட சுற்றுச்சூழல் அனுமதியை ரத்து செய்தது தென்மண்டல பசுமைத் தீர்ப்பாயம்.
Read more ...

முதுமலை புலிகள் காப்பகத்தில் ரூ.3 ஆயிரம் கட்டணத்தில் வாகன சவாரி.!


சிறந்த சுற்றுலா தலமாகவும், வன விலங்குகளின் வாழ்விடமாகவும் விளங்கி வரும் முதுமலை புலிகள் காப்பகத்தில் யானைகள், புலிகள் உள்பட பல்வேறு வனவிலங்குகள் வசித்து வருகின்றன. சுற்றுலா பயணிகளை முதுமலை அதிகளவில் கவர்ந்து உள்ளதால் நாள்தோறும் நூற்றுக்கணக்கான சுற்றுலா பயணிகள் முதுமலைக்கு வந்து செல்கின்றனர்.

முதுமலையை சுற்றி பார்க்க வரும் சுற்றுலா பயணிகளை வனத்துறையினர் வாகன சவாரி மற்றும் யானை சவாரி மூலமாக அழைத்து சென்று வனப்பகுதியையும், வனவிலங்குகளையும் சுற்றி காண்பித்து வருகின்றனர். வாகன சவாரி காலை மற்றும் மாலை நேரங்களில் நடைபெறுகிறது. அதேபோல் யானை சவாரியும் காலை, மாலை நேரங்களில் இயக்கப்படுகிறது.

வாகன சவாரி

தற்போது யானை சவாரி செய்ய 4 பேர் கொண்ட ஒரு குழுவுக்கு ரூ.860 கட்டணமாக வசூலிக்கப்பட்டு வருகிறது. இதனிடையே கர்நாடக மாநிலம் பந்திப்பூர் புலிகள் காப்பகத்தில் சுற்றுலா பயணிகளை வனப்பகுதிக்குள் அழைத்து செல்ல புதிய வாகனம் ஒன்று வாங்கப்பட்டு உள்ளது. இதேபோல் முதுமலையிலும் சுற்றுலா பயணிகளை அழைத்து செல்ல புதிய வாகனம் ஒன்று வாங்கப்பட்டு உள்ளது. இதன் தொடக்க விழாவில் முதுமலை புலிகள் காப்பக கள இயக்குனர் சீனிவாச ரெட்டி கலந்து கொண்டார். தெப்பக்காடு வனச்சரகர் ஆரோக்கியசாமி மற்றும் தெப்பக்காடு முன்பதிவு மைய வனச்சரகர் மாரியப்பன் ஆகியோர் கொடி அசைத்து தொடங்கி வைத்தனர்.

இதுகுறித்து வனத்துறையினர் கூறுகையில், புதிதாக வாங்கப்பட்ட வாகனத்தில் 6 முதல் 7 பேர் வரை பயணம் செய்யலாம். இதற்காக அவர்களிடம் இருந்து மொத்தம் ரூ.3 ஆயிரம் கட்டணமும், நுழைவு கட்டணமாக சுற்றுலா பயணிகளுக்கு தலா ரூ.115 வசூலிக்கப்படும். இந்த வாகனத்தை விருப்பம் உள்ளவர்கள் முழுதொகையை செலுத்தி தனியாகவும் செல்லலாம். இவர்கள் 1½ மணி நேரம் வனப்பகுதிக்குள் அழைத்து செல்லப்பட்டு வனவிலங்குகளை சுற்றி காண்பிக்கப்படும். இவ்வாறு அவர்கள் கூறினார்கள்.
Read more ...

சிசேரியன் பெருகுவதற்கான காரணங்கள் என்ன..?

சமீப நாட்களாக, அதிக அளவில் சிசேரியன் செய்வதாக, மகப்பேறு மருத்துவர்களின் மீது பெரும் குற்றச்சாட்டு ஒன்று நிலவி வருகிறது. 'சுகப்பிரசவமா..? சிசேரியனா..?  இதை யார் முடிவு செய்கிறார்கள் என்பதைப் பார்க்கும் முன் சிசேரியன் பற்றி சற்றே தெரிந்து கொள்வோம்.

சிசேரியன் என்றால் என்ன?


இயல்பாக, பெண்ணுறுப்பின் வழியாக குழந்தை பிரசவிக்க இயலாத நிலையில், மேற்கொள்ளப்படும் அறுவை சிகிச்சைதான் சிசேரியன். 17ஆம் நூற்றாண்டு வரை, இறக்கும் தருவாயில் இருக்கும் தாயிடம் சேயைக் காப்பதற்காக மட்டுமே சிசேரியன் செய்யப்பட்டது. சிசேரியன் செய்தால், தாய் இறந்து, சேய் மட்டுமே உயிருடன் இருக்கும், என்ற நிலையில் ஆரம்பித்து, பிறகு பல்வேறு பரிணாம வளர்ச்சிகளைக் கண்டு, தற்போது அடிவயிற்றில் செய்யப்படும் தழும்பு வெளித்தெரியாத சிசேரியனாக வளர்ந்துள்ளது. 

சிசேரியன் அறுவை சிகிச்சையின் வகைகள்:

சிசேரியன் அறுவை சிகிச்சை இரண்டு வகைப்படும். 

1. தாய்சேய் உடல்நிலையின் காரணமாக, முன்னரே தேர்ந்தெடுக்கப்படும் திட்டமிட்ட சிசேரியன் (Elective Surgery).
2. வேறு வழியின்றி அவசரநிலையில் செய்யப்படும் சிசேரியன். (Emergency Surgery).

எந்த முறையாக இருப்பினும், உலக சுகாதார அமைப்பின் பரிந்துரையின்படி, ஒரு நாட்டில் சிசேரியன் எண்ணிக்கை மொத்த பிரசவ எண்ணிக்கையில் 10-15% தான் இருக்க வேண்டும். ஆனால் இந்திய மருத்துவமனைகளில் இந்த எண்ணிக்கை தற்போது 38- 42% வரை உள்ளது..! 

இந்த எண்ணிக்கை கூடுவதற்கு, தனியார் மருத்துவமனைகளும், மருத்துவர்களும் மட்டும் தான் காரணமா? அரசு மருத்துவமனைகளின் பங்கு என்ன?  இந்த சிசேரியனால் ஒரு நன்மை கூட இல்லையா என்று பார்த்தால், உலக சுகாதார அமைப்பின் ஆய்வின்படி, சிசேரியன் எண்ணிக்கை உலகெங்கிலும் வருடந்தோறும் 4 முதல் 5% வரை அதிகரித்து வருகிறது.

சிசேரியன் பெருகுவதற்கான காரணங்கள்:

பெருகும் மக்கள் தொகை ஒரு முக்கிய காரணமாக கூறப்படுகிறது. இந்தியாவில் மருத்துவத்துறை பல முன்னேற்றங்களைக் கண்டுள்ளது. இதில் மிக முக்கியமான மைல்கல்லாக கருதப்படுவது, தொடர்ந்து குறைந்து வரும், தாய் - சேய் இறப்பு சதவிகிதம்..! 

ஐக்கிய நாடுகள் சபையின், Millennium Development Goal எனப்படும் MDGயின் இலக்கு 4 மற்றும் 5. அதாவது மிகக் குறைந்த தாய் - சேய் இறப்பு சதவிகிதம் என்ற இலக்கினை, தென் மாநிலங்களில் கேரளா மற்றும் தமிழகம் 2015லேயே அடைந்துவிட்டது. மற்ற மாநிலங்களுக்கு முன்னுதாரணமாகவும் விளங்குகின்றது கேரளாவும், தமிழகமும்.!

மருத்துவத் துறையின் முக்கிய வளர்ச்சியை பிரதிபலிக்கும் இந்த நிலை எப்படி சாத்தியமானது?

நாடெங்கிலும் பிரசவப்பேறு, மருத்துவமனைகளில் மட்டுமே நடந்திட வழிவகுக்கும் திட்டங்கள், அனைத்து அரசு மருத்துவமனைகள் மற்றும் சுகாதார நிலையங்களில் 24x7 செயல்படும் மகப்பேறு மற்றும் மயக்கவியல் துறைகள், பரவலாக பயன்படுத்தப்படும் குழந்தைக்கான மின்னணு கண்காணிப்பு இயந்திரங்கள், ஆபத்தான சூழ்நிலைகளில் தக்க சமயத்தில் மேற்கொள்ளப்படுகின்ற சிசேரியன் சிகிச்சை, மிகவும் குறைவாக பயன்படுத்தப்படும் ஆயுதப் பிரசவங்கள், தனியார் மற்றும்
அரசு மருத்துவமனைகளில் மிக அருமையாக செயல்படுகின்ற பிறந்த குழந்தைக்கான தீவிர சிகிச்சை பிரிவுகள் ஆகியவை இந்த இலக்கினை எட்ட பெரிதும் உதவியுள்ளன என்பதை யாரும் மறுக்க முடியாது..

அடுத்து.. இன்று பல குடும்பங்களில், 'Nuclear family' என்பது "நாமிருவர் நமக்கிருவர்" அல்ல; "நாமிருவர் நமக்கொருவர்" என்று மாறிவிட்டது. ஆம்! அன்று ஏழெட்டு குழந்தைகள் வரை பிரசவித்த பெண், இன்று ஒரு குழந்தையை பிரசவிக்கவே தயங்குகிறாள். அன்று கூட்டுக் குடும்பத்தில், பத்திற்கும் மேல் குழந்தைகள் இருந்த வீட்டில், பேறுகாலத்தில் தங்களுக்கு நேர்ந்த ஒரு குழந்தையின் இறப்பினை, எளிதாக ஏற்றுக்கொண்ட பெற்றோர்களால், இன்றைய சூழலில் தங்களுடைய ஒரே குழந்தையின் இறப்பு என்பது வாழ்வின் அனைத்து எதிர்காலக் கனவுகளை இழந்து நிற்பதாக மாறிவிட்டதைக் காண்கிறோம்.

இந்நிலையில், அவர்களது ஒரே குழந்தையை முழு நலத்துடன் அவர்களுக்கு வழங்க வேண்டிய கடமை மற்றும் சமூக அக்கறையின் அழுத்தத்தை மகப்பேறு மருத்துவர் முற்றிலும் ஏற்றுக்கொள்கிறார்.

 இந்த கூடுதல் பொறுப்பை மகப்பேறு மருத்துவர் ஏற்று மேற்கொள்ளும்போது, முடிந்தவரை சுகப்பிரசவத்திற்கு முயன்று பார்க்கலாம் என்ற நிலை மாறி, குழந்தையின் நலனில் எள்ளளவும் குறை நேர்ந்துவிடக் கூடாது என்கின்ற நிலை முன்னிற்பதால், சிசேரியன் எண்ணிக்கையும் சற்று கூடத் தான் செய்கிறது..

சிசேரியனே சுகப்பிரசவத்தை விட சிறந்தது எனக் கருதப்படும் சில பிரத்யேக சூழ்நிலைகளை முதலில் பார்ப்போம்..

வாழ்க்கை முறை காரணமாகப் பெருகிவரும் குழந்தையின்மையும், அதன் காரணமாக மேற்கொள்ளப்படும் செயற்கை முறை கருத்தரிப்பும் தான் சிசேரியனுக்கு முதல் காரணமாக மாறிவிட்டது. 

'டெஸ்ட் டியூப்' முறை மூலமாக கருத்தரிப்பதில் உள்ள சிரமங்கள், மன அழுத்தம் மற்றும் பணவிரயம் ஆகியவற்றை கவனத்தில் கொண்டு, ISOM எனப்படும் உலக மகப்பேறு சங்கம் சிசேரியன் சிகிச்சையை இவர்களுக்கு பரிந்துரைக்கிறது. ஒன்றுக்கு மேற்பட்ட குழந்தைகள் கருவில் இருத்தல். அதிலும் இரட்டை அல்லது அதற்கு மேம்பட்ட கர்ப்பங்களில் ஏற்படும் தாய் சேய் சிக்கல்களால், சிசேரியன் பலமுறை சிபாரிசு செய்யப்படுகிறது.

 இருதயநோய், சர்க்கரை நோய், இரத்த அழுத்தம், காமாலை, 35 வயதிற்கு மேல் கர்ப்பம் தரித்தல், சில தொற்று நோய்கள் ஆகிய மருத்துவச் சிக்கல்களினாலும் சிசேரியன் மேற்கொள்ளப்படுகிறது. Malpresentation எனப்படும் 'குழந்தை நேராக இல்லாமல் குறுக்கே திரும்பிய நிலை' (புட்டப்பேறு அல்லது பிழைப்பிரசவம்) நிலையில் சுகப்பிரசவமானது முற்றிலும் தாய்- சேய் உயிருக்கு ஆபத்தானது என்ற காரணத்தால், அறுவை சிகிச்சை மேற்கொள்ளப் படுகிறது.

வளர்ச்சி குன்றிய (IUGR) அல்லது குறைப்பிரசவம் (Preterm).. குறைந்த எடையுடன் பிறக்க நேரிடும் பிரசவங்களிலும், சிசேரியனின் எண்ணிக்கை அதிகரிக்கின்றது. தாயின் இடை குறுகி இருந்தாலோ, குழந்தையின் தலை அல்லது உடல் பருத்து இருந்தாலோ, சுகப் பிரசவத்திற்கு ஒரு தடையாகவே இருக்கும் என்பதால் சிசேரியன் மேற்கொள்ளப் படுகிறது.

Repeat Caesarean என்கின்ற, திரும்பச் செய்யப்படும் சிசேரியன் நிலை.. இதில் முதல் சிசேரியன் மூலமாக வந்த தழும்பு வெடித்து, அதனால் ஏற்படக்கூடிய ஆபத்துகளைத் தவிர்க்க, சிசேரியன் மேற்கொள்ளப் படுகிறது.

மேற்கூறிய அனைத்து High Risk Pregnancy என்ற அசாதாரண பிரசவங்களிலும், Elective Caesarean என்ற திட்டமிட்ட சிசேரியன் மேற்கொள்ளப்படுகிறது..

ஆனால், குழந்தைக்கு மூச்சுத் திணறுதல், பிரசவம் தொடர்ந்து முன்னேறாமல் இருத்தல், கர்ப்ப கால இரத்தக் கொதிப்பினால் தாய்க்கு ஏற்படும் ஜன்னி, நஞ்சுக் கொடி விலகுதல் போன்ற சூழ்நிலைகளில், Emergency Caesarean என்ற அவசரநிலை சிசேரியன் மேற்கொள்ளப் படுகிறது..

இவையெல்லாம் மருத்துவக் காரணங்கள். ஆனால், இன்றைய காலகட்டத்தில், பெண்களின் மனநிலையும் பிரசவ முறையை தீர்மானிக்கும் ஒரு முக்கிய காரணியாக மாறிவிட்டது..

வலியில்லாமல் பிரசவப்பேறு நடக்க வேண்டும் என்று பெண்கள் எதிர்ப்பார்க்கின்றனர்..
இதற்கு பெண்ணின் கணவர், பெற்றோர் மற்றும் உற்றார் என அனைவரும் ஆதரவு தருகின்றனர். அவர்களது ஒரே பெண், வலியில் மருகுவதை எந்த பெற்றோரும் விரும்புவதில்லை. பிரசவ வலியை ஏற்றுக் கொள்ளாத மனநிலை, அதிக உடற்பருமன், உடற்பயிற்சியின்மை  ஆகியவற்றை முன்னிறுத்தி, சிசேரியன் தான் எளிதான பிரசவமுறை என்று மருத்துவரை சந்திக்கும் முன்பு இவர்களே தீர்மானம் செய்து விடுகின்றனர்.

இது மட்டுமல்லாது, குழந்தையின் படிப்பு, திருமணம், எதிர்காலம் அனைத்தும் ஜாதக கட்டங்களில் அடங்கி இருப்பதாக நம்பும் சமூகம், நல்ல நாள், நல்ல நேரம், ஏற்ற நட்சத்திரம் என்று குழந்தையின் ஜாதகத்தை முன்கூட்டியே கணித்து, மருத்துவர்களை கட்டாயப் படுத்தும் நிர்ப்பந்தங்கள் நிகழ்ந்த வண்ணம் உள்ளது. மூட நம்பிக்கைகள், இயற்கையை வென்றுவிட்ட நிலையில்,  நிமிடம் மற்றும் நொடிக்கணக்கு கூட தவறாமல் நல்ல நேரத்தில், தனது குழந்தை பிறக்க வேண்டும் என்று கைகளில் கடிகாரங்களை சுமந்து நிற்கும் பட்டதாரி கணவர்கள் அறுவை அரங்கிற்கு முன்னர் நின்று கொண்டேதான் இருக்கின்றனர்.

இதனை அரசு மருத்துவமனைகளில் செயலாக்க முடியாது என்பதால் தனியார் மருத்துவமனைகளில் தங்களது குழந்தையின் ஜாதகத்தைப் பெற்றுக் கொள்ள முயன்று கொண்டேதான் இருக்கிறார்கள். 

"On demand Caesarean” என்பதும், "On demand timed Caesarean" என்பதும் பரவலாக நடந்தாலும், அதன் பின் இருக்கும் காரணத்தை எந்த ஊடகமும் கணக்கில் கொள்வதில்லை. 

மத்திய மற்றும் மாநில அரசாங்கம்,  நாடெங்கிலும் உள்ள மருத்துவ வல்லுநர்கள், 
FOGSI மற்றும் IAP போன்ற தேசிய மகப்பேறு மற்றும் குழந்தைகள் அமைப்புகள் என அனைத்து அமைப்புகளும், சிசேரியன் எண்ணிக்கையைக் குறைக்க பல்வேறு முயற்சிகளை மேற்கொண்டுதான் வருகின்றனர். இதற்கு மருத்துவர்களும் தங்களது பங்களிப்பைக் கொடுத்துக்கொண்டே தான் இருக்கிறோம். 

உதாரணத்திற்கு எனது மருத்துவமனையில், 'Primi Caesarean' எனப்படும் தலைச்சன் சிசேரியன் அளவு, 20%த்தை தாண்டியதில்லை..! ஆனாலும்,  சில சமயங்களில், சிசேரியன் பெருகுவதற்கு மகப்பேறு மருத்துவரும் ஒரு காரணி என்பதை மறுக்க முடியாது. 

பேறு காலத்தில், தாய் அல்லது சேய்க்கு உயிரிழப்போ அல்லது நிரந்தர பின் விளைவுகளோ ஏற்பட நேரிட்டால், தற்போதுள்ள நுகர்வோர் பாதுகாப்பு சட்டம் மருத்துவர்களை வெகுவாக அச்சப்படுத்துகின்றன.

மேலும், Maternal Death Review எனப்படும் மகப்பேறு காலத்தில் ஏற்படும் இறப்புகளைக் கணக்கெடுக்கும் தணிக்கை குழுவின் விவாதங்கள், மருத்துவரை பெரிதும் பாதிக்கின்றன. இவையனைத்தும், ‘நமக்கேன் வம்பு’ என்று மகப்பேறு மருத்துவரை பாதுகாப்பான முறையான சிசேரியனை தேர்ந்தெடுக்க வைக்கின்றன. 

மேலும், ஒரு மருத்துவரே இருவேறு மருத்துவமனைகளில் பணிபுரியும் போது, விரைவாக பணியை முடித்திட சிசேரியன் முறையைத் தேர்ந்தெடுப்பதும் கூட சமயங்களில் நிகழ்கிறது.
இவையனைத்தும், சிசேரியன் ஏன் அதிகரிக்கிறது என்பதை காட்டுகின்றன. 

சிசேரியன் எண்ணிக்கையைக் குறைத்திடவும், சுகப் பிரசவத்தின் எண்ணிக்கை கூடவும் மருத்துவர்களுக்கு சில ஆலோசனைகளை வழங்குகிறது FOGSI எனப்படும் இந்திய மகப்பேறு சங்கம். கருவுற்ற காலம் தொடங்கி மகப்பேறு வரை  மேற்கொள்ள வேண்டிய ஆலோசனைகளை, கர்ப்பிணிப் பெண்களுக்கு வழங்குதல். கர்ப்ப காலத்தை, அச்சத்துடன் பார்க்காமல், இயல்பாக ஏற்றுக்கொள்ளும்படி அறிவுறுத்துதல். 'Birthing classes' எனப்படும் பேறுகால விழிப்புணர்வு வகுப்புகளை அனைத்து மருத்துவமனைகளிலும் மேற்கொள்ளுதல். சுகப்பிரசவத்தையும், அதன் முக்கியத்துவத்தையும் வலியுறுத்துதல். சிசேரியன் மற்றும் ஆயுதப் பிரசவ முறைகளில் உள்ள ஆபத்துகளை எடுத்துரைத்தல். கர்ப்ப கால உடற்பயிற்சி மற்றும் யோகா வகுப்புகளை பரிந்துரைத்தல். வலியில்லா பிரசவ முறையை பரவலாக கையாளுதல். Family centred delivery எனப்படும், பிரசவத்தின் போது, கணவன் அல்லது தாய் அல்லது நெருங்கிய தோழி உடனிருத்தல் 
ஆகிய இந்த முறைகள், இயற்கையான சுகப்பிரசவத்திற்கு பெரிதும் உதவுகின்றன..

ஆம்.. பெண்மைக்கென்றே இயற்கை அளித்திருக்கும் உன்னத வரம் ‘தாய்மை’! ‘தாய்மை’ என்பது ஒவ்வொரு பெண்ணும் புதிதாக தாயாகவும், தன் மூலம் மீண்டும் ஒரு சேயாகவும் ஜனனிக்கும் உன்னத நிலை..!

தாய்மை எளிதானதல்ல என்றாலும், எப்போதும் அதை பயத்துடன் எதிர்நோக்க வேண்டிய நிலையும் அல்ல. தாய்மையை, பெருமையாக ஏற்றுக் கொண்டு, மகப்பேற்றை எளிதான இயற்கையான முறையில் செயல்படுத்திட பெண்களுடன் நாம் அனைவரும் முன்னிற்போம்..!

Thanks to:
Dr. Sasithra Dhamodharan,
Savidha Medical Center and Hospital,
Coimbatore.
Read more ...

வீடுகளில் வளர்க்க 6 தாவரங்களுக்கு தடை..!

இந்தியாவில் இயற்றப்பட்ட வன உயிரினப் பாதுகாப்புச் சட்டம் 1972-இல் வன உயிரினங்கள் எண்ணிக்கை, அவற்றின் முக்கியத்துவம் அடிப்படையில் பட்டியல்-1 முதல் பட்டியல்- 6 வரை என வகைப்படுத்தப்பட்டு அவற்றை வேட்டையாடவே, வேட்டையாட முயன்றாலே சட்டப்படி குற்றமாகக் கருதப்படுகிறது.

இந்த 6 வகை பட்டியல்களில் தெரிவிக்கப்பட்ட உயிரினங்கள் அனைத்தும் பாதுகாக்கப்பட வேண்டிய வன உயிரினங்களாகக் கருதப்படுகின்றன. இதில், 6-ஆவது பட்டியலில் 6 அரிய வகை தாவரங்களுக்கும் இடம் அளிக்கப்பட்டுள்ளது. அதனால், இந்த 6 தாவரங்களும் பாதுகாக்கப்பட வேண்டிய வன உயிரினங்களாகக் கருதப்படுகின்றன.

இதுகுறித்து மாவட்ட வன அலுவலரும், வன உயிரின ஆராய்ச்சியாளருமான வெங்கடேஷ் கூறியதாவது:

இயற்கைச் சூழலில் தானாக வளரும் அனைத்து உயிரினங்களையும் வன உயிரினங்கள் எனலாம். அதனால், வன விலங்குகளைப் போல் வனப் பகுதிகளில் அரிதாகக் காணப்படுவதால் சைகஸ் பெட்டேமி (மதன காமராஜா அல்லது ஏந்த பனை), புளூ வாண்டா, ரெட் வாண்டா, குத், லேடி சிலீப்பர் ஆர்கிட், குடுவை பூச்சி உண்ணும் தாவரம் (குடுவை தாவரம்) ஆகிய 6 வகை அரிய தாவரங்களும் வன உயிரினப் பாதுகாப்புச் சட்டத்தின் பட்டியல் 6-இல் சேர்க்கப்பட்டுள்ளன.

இந்த தாவரங்களைச் சேகரிக்க வேண்டுமெனில் தலைமை வன உயிரினக் காப்பாளரிடம் அனுமதி பெற வேண்டும். அனுமதி இல்லாமல் இந்தத் தாவரங்களை வாங்கவோ, விற்கவோ, ஏற்றுமதி செய்யவோ, வீடுகளில் வளர்க்கவோ முற்றிலும் தடை செய்யப்பட்டுள்ளது. இந்த தாவரங்களை வீட்டில் வைத்திருப்பதும் குற்றமாகவே கருதப்படுகிறது.

சைகஸ் பெட்டேமி தாவரம் ஆந்திர மாநிலத்தில் உள்ள திருப்பதி மற்றும் கடப்பா மலைப் பகுதிகளில் மட்டுமே உள்ளது. மருந்துகளுக்கு இந்தத் தாவரம் அதிகமாக பயன்படுத்தப்படுவதால் அழிந்து வருகிறது. ஆண்டுதோறும் இந்த மலைப் பகுதிகளைச் சுற்றி தொடர்ச்சியாக ஏற்படும் காட்டுத் தீயாலும் இவை அழிந்து வருகின்றன.

மணிப்பூர் மாநிலத்தில் மட்டுமே காணப்படும் ரெட் வாண்டா தாவரத்தின் பூக்கள் பார்ப்பதற்கு அழகாகவும், ரம்மியமாகவும் இருக்கும். இத் தாவரம் காஸ்டல் என்று மற்றொரு பெயரிலும் அழைக்கப்படுகிறது. காஷ்மீர் மலைகள் மற்றும் மேற்குத்தெடர்ச்சி மலைப் பகுதிகளில் சுமார் 2,500 முதல் 3,000 மீட்டர் உயரத்தில் வளரும் தன்மை கொண்டது. இத்தாவரத்தின் வேர் பாரம்பரியமாக மருந்து மற்றும் வாசனைத் திரவியங்கள் தயாரிக்கவும் பயன்படுத்தப்படுகிறது.

குடுவை என்னும் பூச்சி உண்ணும் தாவரத்தின் இலை ஒரு குடுவை போல் இருக்கும். இதனுள் ஒரு வகை திரவம் நிரம்பியிருக்கும். பூச்சிகள் இந்த தாவரத்தில் அமரும்போது குடுவை போன்ற இலைக்குள் இருக்கும் திரவத்தால் ஈர்க்கப்பட்டு குடுவைக்குள் அந்த பூச்சி வழுக்கி விழுந்துவிடும். மூழ்கும் பூச்சிகள் திரவத்தில் உள்ள வேதியியல் நொதிப் பொருட்களால் கரைக்கப்படும். இந்த கரைக்கப்பட்ட கரைசல் அமினோ அமிலமாக மாற்றப்படும். இதை தாவரம் தன் வளர்ச்சிக்காக எடுத்துக்கொள்ளும். இந்தத் தாவரம் காடுகளில் அரிதாக காணப்படுகிறது. இவ்வாறு அவர் தெரிவித்தார்.
Read more ...

வயது 10 தான்.. ஆனால் 400 மொழிகள் தெரியுமாம்.. கலக்கும் மஹ்மூத் அக்ரம்..!

தமிழ்நாடு, இராமநாதபுர மாவட்டம், அபிராமம் கிராமத்தை பூர்விகமாக கொண்டவரும், தற்போது சென்னையில் வசித்து வரும் மொழிப்பிரியன் அவர்களின் மகன் மஹ்மூத் அக்ரம்.

பத்து வயதே ஆகியுள்ள இச்சிறுவன், உலக இளம் வயது தட்டச்சு சாதனையாளன் (World Youngest Multilingual Typist ) என்ற அவார்டை பெற்றுள்ளான். பல மொழிகளின் ஆற்றலையும் தனது 7 வயது முதல் கற்று வந்துள்ளான். இந்திய,வெளிநாட்டு மற்றும் பழங்கால கல்வெட்டு மொழிகளை கற்று, 400 ற்கும் மேற்பட்ட மொழிகளிகளில் படிப்பதற்கும், எழுதுவதற்கும், டைப் ரைட்டிங் செய்வதற்கும் பயிற்சி எடுத்துள்ளான். 400 மொழிகளில் வேகமாக டைப்பிங் செய்யும் அபாரத் திறமையின் மூலம் அனைவரையும் ஆச்சரியத்தில் ஆழ்த்துகிறான். இதோடு மட்டுமில்லாமல் இந்தியாவின் தேசிய கீதமான ”ஜன கண மன” வை சுமார் 40 மொழிகளில் பார்க்காமல் 2 மணி நேரத்தில் எழுதி முடித்து விடுகிறார்

இச்சிறுவனுக்கு இந்திய, வெளிநாட்டு மொழிகளான அரபிக், அச்செனிஸ், ஆப்ரிக்கன்ஸ், அல் பேனியன், அமசைக், அம்ஹரிக், ஆர்மீனியன், அஸென்தெ டிவி, அஸ்ஸாமிஸ், அஸெர்பைசைனி, பஹஸ பூஹிஸ், பஹஸ மதுர, பாலினிஸ், பலூச்சி, பவ்லே, பாஷ்கிர், பாஸ்கியூ, பஸ்ஸா, பத்தகீஸ், பெலருஷ்யன்,பெம்ப, பெங்காலி, பெத், பிக்கலோனா, பொஸ்னின், பிராகுய், பல்கேரியன், பர்மீஸ், கேஸ்டீலியன். கட்டலன், சிபூவானோ, சென்ட்ரல் குர்தீஷ், சத்தீஷ்கரி, செஷன், செரோக்கீ, சிச்சோவா, சைனீஷ் ஸிம்லிபைடு, சைனீஷ் ட்ரெடிஷ்னல், சியாவோ, சுவாஷ், கிரிலோ, குரோஷன், செக், டாக்பனி, டேனிஷ், தரி, திவிஹி, டோக்ரி, டசூன், டச், ஸோங்கா, ஈஸ்ட் இனிக்ட்யுட், எஜிப்ஸியன் ஹைரோகிளிப், இங்கிலீஷ், இஷ்பெரான்டோ, இஸ்தோனியன், ஈவ், ஃபேன்தே, ஃபிஜியன், ஃபிலிப்பினோ, ஃபினிஷ், ஃப்ரன்ச், ஃபுளா, கா, களிசியன், ஜோர்ஜன், ஜெர்மன், கஜரியா, ஜெக், கிரந்த, கிரீக், குஜராத்தி, ஜிப்ஜி, ஹேஷன் கிரியோ, ஹவ்ஸ, ஹீப்ரு, ஹிந்தி, மாங்க் டவ், ஹங்கேரியன். ஐஸ்லேனிக், ஈபோ, ஐலோகனோ, இந்தோனிசியன், இனிக்ட்யுட் ஆர்க்டிக், ஈரானுன், ஐரிஷ், இட்டாலியன், ஜப்பானிஷ். ஜாவானிஷ், ஜுலா, கபிலீ, கன்னட, கஷ்மிரீ, கட்டலன், கஸக், கென்யா லுவோ. கெமர், கிக்கம்பா, கிக்காங்கோ, கிக்கியூ, கின்யார்வன்டா, கிளிங்ஆன், கொரியன், கெப்பல், குர்தீஷ், கட்ச்சி, கிர்கீஷ், லம்பாடி, லவ், லத்தீன், லத்தீவன், லெப்ச, லிம்பூ, லிங்கள, லிஷு, லித்துனியன், லுகன்டா, மெஸிடோனியன், மலகஸி, மலாய், மலையாளம், மால்டீஸ், மன்ச்சூ, மந்தர், மந்தின்க, மணிப்பூரி, மரான்னவ், மராட்டி, மெந்தி, மங்கோலியன், நேபாலி, நாக்கோ, நோர்விஜியன். நிஜிமா, ஒக்சிடன். ஒரியா, உருமூ, ஒஸ்ஸஷன், பஷ்தோ, பெர்சியன். பொனிசியன், பொலிஷ், போர்ச்சுகீஷ், புலார், பஞ்சாபி, ரோஹிங்யலிஷ், ரொமானியன், ருஷ்யன், ஸாமோன், ஸான்ஸ்கிரிப்ட், ஸரைக்கீ, ஸ்கோட்ஸ், ஸெர்பியன். ஸெஸத்தோ, ஷோனா. ஸிந்தி, ஸிங்கள, சுலோவக், சுலோவனியன். ஸோமாலி, ஸ்பானிஷ், சுன்டாநீஷ், சுராநன், ஸ்வாஹிலி, ஸ்விடீஷ், சிரியக், தகலோக், தஜிக், தமசைத், தமிழ், தமிழ் பிராமி, தத்தர், டி ரியோ மாயூரி, தெலுகு, டெம்னே, தாய், திபெத்தியன், டைக்ரின்யா, டோங்கன், டோஸ்க், துர்கிஷ், துர்க்மென், துவலு, உக்ரனியன். உருது, உய்குர், உஸ்பெக், வாய், வியட்னாமிஷ், வாலி, வெல்ஷ், வெஸ்ட் இனிக்ட்யூட், வெஸ்டன் பஞ்சாப், உல்ப், கோஸா, யாவோ, யிதிஷ், யிரோபா, ஸஜக்கி, ஜுலூ போன்ற மொழிகள் தெரியும்.

கடந்த வருடம் 2014, இந்தியாவின் Unique World Records” என்ற நிறுவனத்தினர் மஹ்மூத் அக்ரமின் அபாரத்திறமையை அறிந்து, அவருகளுடைய வேர்ல்டு ரிக்கார்டு கலந்து கொள்ளுமாறு அழைப்பு விடப்பட்டு இருந்தது. அதன்படி மஹ்மூத் அக்ரம் கலந்து கொண்டு, பல VIP க்கள் முன்னிலையில் தன் திறமையை வெளிகாட்டி, புதிய உலக சாதனை செய்து “World Youngest Multilingual Typist” என்ற பட்டத்தை பெற்றார்.
இந்தியாவில் உள்ள பல மீடியாக்களும். வளைகுடா நாட்டில் உள்ள மீடியாக்களும் பாராட்டி உள்ளனர்.

கடந்த வருடம் 2015, இந்தியாவின் India book of Record-TamilNadu book of Record-Asia book of Record என்ற குழுவின் நிறுவனத்தினர் ”சாதனை தமிழகம் 2015” என்ற நிகழ்ச்சியில் தன்னுடைய திறமையை வெளிகாட்டுமாறு அழைப்பு விடப்பட்டிருந்தது. அதில் கலந்து கொண்டு ”In the Name of God, the Merciful, the compassionate” என்ற வாக்கியத்தின் 200 மொழிகளின் மொழிப்பெயர்ப்பை 1 மணி நேரம் 30 நிமிடங்களில் டைப்பிங் செய்து புதிய உலக சாதனை செய்துள்ளான்.

அது போல முஸ்லிம்களின் வேத நூலான குர்ஆனின் முதல் அத்தியாயமான ”சூரா பாத்திஹாவை” கிட்டத்தட்ட 180 மொழிகளின் மொழிபெயர்ப்பில் 8 மணி நேரம் தொடர்ந்து டைப்பிங் செய்து சாதனை செய்துள்ளார் என்பதும் குறிப்பிடத்தக்கது.

இவனுடைய அறிவாற்றலை பற்றியும், இவனுக்கு எப்படி ஆர்வம் என்பது பற்றியும், இவனுடைய தந்தை அப்துல் ஹமீது கூறும் பொழுது:
ஒரு நாள் நான் ஆங்கிலத்தில் டைப்பிங் செய்து கொண்டு இருக்கும் பொழுது, என் பையன் அதை பார்த்து கொண்டு இருந்தான். அப்பொழுது அவனுக்கு வயது 7. எனக்கும் டைப்பிங் கற்றுக் கொடுக்குமாறு கேட்டான். சும்மா நச்சரிக்கிறானே என்று தான் கற்றுக்கொடுத்தேன். அன்றே கற்றுக் கொண்டு வேகமாக டைப்பிங் செய்ய ஆரம்பித்து விட்டான்.

நான் இங்கிலீஷ் டைப்பிங் கற்றுக் கொள்வதற்காக, டைப்பிங் சென்டர் போய் சரளமாக டைப்பிங் செய்வதற்கு கிட்டத்தட்ட 6 மாதம் ஆகிவிட்டது. இவன் ஒரு 6 மணி நேரத்தில் டைப்பிங் பழகி விட்டானே என்று எனக்கு ரொம்ப ஆச்சரியமாக இருந்தது. ஒரே நாளில் ஒரு நிமிடத்திற்கு 50 வார்த்தைகள் என்று வேகமாக டைப்பிங் செய்ய ஆரம்பித்த்து மிக மிக வியப்பான விஷயமாக இருந்தது. அடுத்த நாள் அவனை டெஸ்ட் செய்வதற்காக அரபிக் மொழியை கற்றுக் கொடுத்து, டைப்பிங் செய்ய வைத்தேன். என்ன ஆச்சரியம்! ஒரே நாளில் சரளமாக டைப்பிங் செய்ய ஆரம்பித்து விட்டான். அன்று தான் முதன் முதலில், அவனுடைய மொழி ஆற்றலை உணர்ந்து கொண்டேன். படிப்படியாக ஹீப்ரு, மலையாளம், உருது, தெலுகு. ஹிந்தி என்று ஆரம்பித்தேன். அவனும் மிக ஆர்வமாக எல்லா மொழிகளை கற்றுக் கொண்டான். அது மட்டுமில்லாமல் வேகமாக டைப்பிங் செய்யவும் ஆரம்பித்தான். இதற்கிடையில் நான் வேலைக்காக வளைகுடா நாட்டிற்கு சென்று விட்டேன். அங்கு போனாலும் என்னை விடவில்லை. பிறகு அங்கிருந்து அவனுக்கு ஸ்கைப் வீடியோ மற்றும் இமெயில் மூலமாக கற்றுக் கொடுத்து வந்தேன். அவனாகவே அதை புரிந்து கொண்டு (self taught) கற்று கொண்டான்.

எந்த ஒரு மொழியையும் அவனுக்கு கற்றுக் கொடுப்பதற்கு நான் முதலில், அம்மொழியின் எழுத்துக்களை கற்றுக் கொடுப்பேன். பிறகு எப்படி உச்சரிக்க வேண்டும் என்றும் வாக்கியங்களை வாசிக்கவும் சொல்லி கொடுப்பேன். கடைசியில் தான் டைப்ரைட்டிங் செய்வதற்கு கற்றுக் கொடுப்பேன். எனக்கு உலக மொழிகளில் 14 மொழிகளில் படிப்பதற்கும், எழுதுவதற்கும், பேசுவதற்கும் மற்றும் டைப்ரைட்டிங் செய்வதற்கும் தெரியும் என்பதால் அத்தனையும் சொல்லி கொடுத்து விட்டேன். ஆனாலும் மேலும் மேலும் வேற மொழியை கற்கணும் என்ற ஆர்வத்தால் மறுபடியும் என்னை நச்சரிக்க தொடங்கவிட்டான். கடைசியாக நான் இவனுக்காக என்னுடைய நேரத்தை ஒதுக்கி நான் ஒவ்வொரு புதிய மொழிகளையும் கற்று கொண்டு, சொல்லிக் கொடுக்க ஆரம்பித்தேன்.

பல மொழிகளை டைப்பிங் செய்யும் பொழுது எனக்கே குழப்பம் வரும். உதாரணத்திற்கு மலையாளத்தில் டைப்பிங் செய்யும் பொழுது தமிழின் கீ போர்டு டைப்பிங் உரிய பட்டன் மாறி விடும். ஆனால் எந்த வித குழப்பம் இல்லாமல் டைப்பிங் செய்கிறான். இவனுக்காக நான் 400 மொழிகளை கற்றுக் கொண்டேன் ஆனால் எனக்கு அந்தந்த மொழிகளில் 50 சதவீதம் தான் என்னால் ஞாபகம் வைக்க முடிகிறது. ஆனால் இவன் எல்லாவற்றையும் தெளிவாக மூளையில் பதிந்து வைத்திருக்கிறான் என்றால் நிச்சயம் இது கடவுள் அவனுக்கு கொடுத்திருக்கும் பரிசாகும். ஒரு மொழியை பேசுவது என்பது எளிது. அந்த மொழியை பேசுவர்களிடம் நாமும் பேசி கொண்டு இருந்தால் அம்மொழியை பேசி விடலாம். அந்த மொழியை படிப்பது, எழுதுவது, டைப்பிங் செய்வது என்பது மிக மிக கடினம். ஆனால் 400 மொழிகளை கற்பது என்பது சாதாரண விஷயமல்ல.

சாதாரணமாக ஒரு மொழியை டைப்ரைட்டிங் செய்வது என்பது எளிதல்ல. எந்த மொழியையும் நாம் டைப்ரைட்டிங் செய்வதற்கு முன்னால் உயிர் எழுத்துகள், மெய் எழுத்துக்கள் மற்றும் கூட்டெழுத்துக்கள் அதனுடைய குறிகளில் அனைத்தையும் கற்று இருக்க வேண்டும்.

அடுத்ததாக கம்ப்யூட்டர் கீ போர்டில் ஒவ்வொரு மொழிக்கும் ஒவ்வொரு மொழியின் கீ போர்டு எழுத்து மாறுபடும். உதாரணத்திற்கு இங்கிலீஷ் கீ போர்டில் ”u” என்று எழுத்து உள்ளது. அந்த பட்டனை நாம் தமிழ் கீபோர்டில் பிரஸ் செய்தால் ”ர” என்று வரும். இதே எழுத்து பட்டனை நாம் அரபிக் கீ போர்டில் பிரஸ் செய்தால் அரபிக் எழுத்தான ”அயின்” என்று வரும். இதே எழுத்து பட்டனை நாம் ஹிந்தி கீ போர்டில் பிரஸ் செய்தால் ஹிந்தி எழுத்தான ”ஹ” என்று வரும். இப்படி ஒவ்வொரு மொழிக்கும், அதனுடைய எழுத்து மாறுபடும். இதில் குழப்பம் இல்லாமல் மிக தெளிவாக அதற்குரிய கீயை அழுத்த வேண்டும் இதுவும் சாதாரண விஷயம் அல்ல. அதிலும் அந்தந்த மொழிகளை கம்ப்யூட்டரில் யுனிக்கோட் முறையில் வேகமாக தட்டச்சு செய்வது மிக மிக ஆச்சரியமாகும். இது மட்டுமில்லாமல் பழங்கால கல்வெட்டு மொழிகளையும் கற்று, அதையும் தட்டச்சு செய்வது இன்னும் ஆச்சரியத்தை அதிகப்படுத்துகிறது.

எகிப்தியர்களின் பிரமிடை பற்றி நாம் அனைவரும் அறிந்ததே. அந்த பிரமிடில் பொறிக்கப்பட்டிருக்கும் சித்திர எழுத்துக்களை கற்றுக்கொண்டு டைப்பிங் செய்கிறான். அதே போல கி.மு 3 ஆம் நூற்றாண்ட்டை சேர்ந்த அசோக மன்னரின் சாரநாத் கல்தூணை நாம் வரலாற்றில் படித்திருப்போம். அந்த கல்வெட்டில் பொறிக்கப்பட்டுள்ள பிராமி எழுத்துக்களை கற்றுக்கொண்டு டைப்பிங் செய்கிறான். அதே போல கி.பி. 5 ஆம் நூற்றாண்டின் தமிழின் முந்தைய எழுத்து வடிவமான கிரந்த எழுத்துக்களை கற்றுக் கொண்டு டைப்பிங் செய்கிறான். கிறிஸ்துவ இயேசுவின் தாய்மொழியாக கருதப்படுகிற அரமேயம்(Armaic) மொழி 3000 ஆண்டு பழைமையக் கொண்டது. இதையும் கற்றுக் கொண்டு டைப்பிங் செய்கிறான்.

இதோடு முடியவில்லை. தாமாக சிந்தித்து ஒரு புதிய மொழியின் எழுத்துக்களை அனைவரும் எளிதாக கற்றுக் கொள்ளும் வகையில் வடிவமைத்து உள்ளான். அதை தந்தையாகிய நான் கம்ப்யூட்டரில் அந்த புதிய மொழியின் எழுத்துக்களை டைப்பிங் செய்த ஏதுவாக, ஃபாண்ட்டாக வடிவமைத்துள்ளேன். அந்த புதிய எழுத்திற்கு ”அத்தா ஸ்கிரிப்ட்” என்றும் பெயரிடப்பட்டுள்ளது.

தமிழ் மொழியை பொறுத்தவரை மொத்தம் 247 எழுத்தாக இருந்தாலும், வட மொழியையும் சேர்த்து 299 எழுத்துக்கள் உள்ளன். ஆக ஒருவர் தமிழில் டைப்பிங் செய்யணும் என்றால், 299 எழுத்துக்கள் நன்றாக மூளையில் பதிந்திருக்க வேண்டும். அப்படி இருந்தால் தான் நாம் மிக வேகமாக பிழையில்லாமல் தமிழில் டைப்பிங் செய்ய இயலும். தமிழை தவிர்த்து, பிற இந்திய மொழிகளில், உயிர், மெய், மற்றும் கூட்டெழுத்துக்கள் சேர்த்து, ஏறத்தாழ 500 க்கு மேல் வருகிறது. இன்னும் சில மொழிகளான சீன மொழி போன்றவற்றில் 50000 எழுத்துக்கள் உள்ளன. இந்த வகையில் நாம் ஆராய்ந்தால், 400 மொழிகளின் எழுத்துக்களை நாம் கூட்டுவோம் என்றால் ஒரு லட்சம் எழுத்துக்கள் மூளையில் மிக தெளிவாக பதிந்திருந்தால் மட்டும் டைப்பிங் இத்தனை மொழிகளில் செய்ய முடியும்.
Read more ...
Copyright © 2016.. Muhanool